ВЕВЧАНИ - 2009

Оваа година по првпат за време на Вевчанскиот карневал како промотори во светот се вклучија и македонските радио аматери. Агенцијата за електронски комуникации експресно издаде специјален повикувачки знак давајќи им можност на десетина илјади радио аматери во светот да слушнат и преку радио аматерска телевизија да видат што се случува на улиците во Вевчани. Радио аматерите од Македонија изработија мини веб страница која за овој краток период беше посетена 10.000 пати, и одржаа огромен број на контакти со колегите од целиот свет. Најактивни меѓу нив беа гевгеличаните Благој Љатев и Ѓорѓе Андонов кои одржаа 7000 врски за 15 дена. Во договор со организаторите на карневалот за секоја одржана врска со радио аматери од земјата и од светот ќе се отпечатат специјални картички кои ќе бидат испратени по специјална пошта до сите земји во светот. Активноста што ја изведоа македонските радио аматери е добар пример дека десетици и стотици илјади луѓе во светот можат да добијат ефективна порака за многу кратко време. Денес во светот има преку два милиони радио аматери, од кои најголемиот дел во САД и Јапонија.